وَإِذَا قِيلَ لَهُمْ لَا تُفْسِدُوا فِى الْأَرْضِ قَالُوا اِنَّمَا نَحْنُ مُصْلِحُونَ. الَّا اِنَّهُمْ هُمُ الْمُفْسِدُونَ وَلَكِنْ لَا يَشْعُرُونَ
وَقَالَ رَسُولُ اللهِ صَلَّى اللهُ عَلَيْهِ وَسَلَّمَ
يَا أَيُّهَا النَّاسُ! إِيَّاكُمْ وَالْغُلُوَّ فِي الدِّينِ، فَإِنَّمَا أَهْلَكَ مَنْ كَانَ قَبْلَكُمُ الْغُلُوُّ فِى الدِّينِ
3. KEQPËRDORIMI I FESË
Musliman të nderuar!
Një nga urtësitë hyjnore pas krijimit të qenies njerëzore është ndërtimi dhe gjallërimi i tokës. Njeriu ndërton një jetë të shëndoshë dhe të qëndrueshme aq sa arrin dijen e saktë fetare. Mirëpo, kur njerëzit largohen nga kjo dije dhe ndjekin epshet, dëshirat, padijen dhe bestytnitë, ndërtimi shndërrohet në shkatërrim, ndërsa përmirësimi zëvendësohet me prishje dhe çrregullim.
Besimtarë të dashur!
Feja jonë e lartë, Islami, e refuzon çdo formë ekstremizmi. Profeti Muhamed ﷺ ka thënë në një hadith:
“O njerëz! Ruhuni nga teprimi në çështjet fetare, sepse ata që ishin para jush u shkatërruan për shkak të teprimit në fe.”¹
Islami i fton muslimanët të ndjekin rrugën e mesme dhe të jetojnë një jetë të ekuilibruar. Allahu i Madhëruar thotë në Kur’anin Famëlartë:
“Gjithashtu ju kemi bërë popull të drejtë, që të bëheni dëshmitarë mbi njerëzit dhe që i Dërguari të jetë dëshmitar mbi ju.”²
Megjithatë, ata që keqpërdorin vlerat fisnike të Islamit, fesë së paqes dhe qetësisë, kanë ekzistuar edhe në të kaluarën dhe, për fat të keq, vazhdojnë të ekzistojnë edhe sot. Qëllimi i tyre është të shkaktojnë përçarje dhe shkatërrim brenda bashkësisë islame, duke u fshehur pas petkut të fesë dhe duke mbjellë përçarje mes muslimanëve.
Muslimanë të nderuar!
Ata që e keqpërdorin fenë paraqiten sikur janë përfaqësuesit e vetëm të saj. Ata e kufizojnë Islamin brenda ideologjive të tyre personale. Për të mbështetur pikëpamjet e tyre, që nuk bazohen në dije të saktë fetare, ata e shkëpusin Kur’anin Famëlartë dhe sunetin nga kuptimi i tyre i vërtetë dhe i nënshtrojnë interpretimeve arbitrare. Nuk hezitojnë të hedhin poshtë hadithet për të legjitimuar gjuhën e tyre përçarëse dhe përjashtuese.
Ata manipulojnë koncepte si shirk, tekfir dhe xhihad, për të justifikuar marrjen e jetëve dhe vrasjen e muslimanëve të tjerë. Kur’ani Famëlartë e zbulon natyrën e vërtetë të këtyre grupeve me këto fjalë:
“Kur u thuhet atyre: ‘Mos bëni shkatërrim në tokë’, ata thonë: ‘Ne jemi vetëm paqebërës!’ Në të vërtetë, ata janë shkatërruesit, por nuk e kuptojnë.”³
Besimtarë të nderuar!
Pronari i fesë është Allahu i Madhëruar. Profeti Muhamed Mustafa ﷺ është ai që e ka jetuar Islamin në mënyrën më të saktë dhe më të përsosur. Sipas Islamit, askush nuk mund ta vendosë veten në pozitën e Allahut apo të të Dërguarit të Tij. Askush nuk ka të drejtë të nxjerrë gjykime në emër të Allahut dhe të të Dërguarit të Tij. Askush nuk mund të shpërfillë trashëgiminë fetare dhe historike të traditës sonë. Askush nuk mund ta konsiderojë veten përfaqësuesin e vetëm të fesë apo të pretendojë se e vërteta absolute i përket vetëm atij.
Askush nuk ka të drejtë ta nxjerrë një musliman jashtë fesë duke e akuzuar për shirk apo mosbesim, as të cenojë jetën, pasurinë apo nderin e tij.
Muslimanë fisnikë!
Sot, shoqëritë muslimane po përballen me një mentalitet të rrezikshëm që e sheh Islamin si pronë ekskluzive të vetën dhe përjashton këdo që nuk përputhet me të. Këto grupe devijante, të cilat përpiqen të ngatërrojnë mendjet e të rinjve përmes platformave digjitale dhe ta lidhin fenë e paqes, Islamin, me dhunën, janë shndërruar në një problem global.
Ne duhet të jemi vigjilentë ndaj këtyre strukturave që kërcënojnë unitetin dhe solidaritetin tonë dhe synojnë të hedhin hije mbi të ardhmen tonë. Duhet të sigurohemi që të rinjtë tanë të marrin dije të saktë fetare përmes metodave të duhura dhe nga persona zyrtarisht të kualifikuar. Duhet të ruajmë dhe të mbrojmë traditën tonë islame, e cila buron nga Kur’ani Famëlartë, suneti dhe qytetërimi ynë.
Dhe nuk duhet të harrojmë se dëmin më të madh Islamit dhe muslimanëve ua shkaktojnë pikërisht ata që e keqpërdorin fenë tonë, vlerat tona dhe konceptet tona të shenjta.
¹ Ibn Maxhe, Menasik, 63
² El-Bekare, 2:143
³ El-Bekare, 2:11–12
Drejtoria e Përgjithshme e Shërbimeve Fetare