Islami dhe uniteti janë dy nga themelet kryesore të fesë islame, që udhëzojnë besimtarët drejt bashkimit, paqes dhe vëllazërisë.
…إِنَّ الدِّينَ عِنْدَ اللهِ الْإِسْلَامُ
وَقَالَ رَسُولُ اللهِ صَلَّى اللَّهُ عَلَيْهِ وَسَلَّمَ: اللَّهُمَّ! إِنِّى أَعُودُ بِكَ مِنَ الشِقَاقِ وَالنِّقَاقِ وَسُوءِ الْأَخْلَاقِ
Të nderuar muslimanë!
Allahu i Madhëruar na ka dhënë mendje dhe vullnet të lirë, në mënyrë që të ndërtojmë dhe të përmirësojmë jetën tonë në këtë botë dhe në Ahiret. Ai ka dërguar pejgamberë dhe ka zbritur libra për udhëzimin tonë. Me dekretin: “Pa dyshim, rruga e vetme e Allahut është Islami,”¹ Ai e ka zgjedhur Islamin për të gjithë njerëzit që do të vijnë deri në Ditën e Kijametit.
Islami është fe që e fton njerëzimin drejt paqes dhe lumturisë. Është fe që i pastron mendjet nga mendimet e këqija, i pastron shpirtrat nga egoizmi dhe lakmia, dhe i tregon njerëzimit rrugën e shpëtimit. Është fe që mëson mënyrat për vendosjen e ndershmërisë dhe drejtësisë, të mirës dhe bukurisë në tokë.
Të dashur besimtarë!
Thelbi i Islamit është teuhidi. Teuhidi është deklarimi dhe pohimi se madhështia dhe madhëria i përkasin vetëm Allahut të Madhëruar. Është nënshtrim ndaj Zotit të vërtetë të ekzistencës dhe arritje e lirisë së vërtetë duke u çliruar nga robëria e epsheve dhe dëshirave. Teuhidi është të mos përkulesh para askujt dhe asgjëje përveç Allahut, duke qëndruar me dinjitet të palëkundur në emër të së vërtetës dhe realitetit.
Allahu i Madhëruar thotë:
“Ky është Allahu, Zoti juaj! Nuk ka zot tjetër përveç Tij. Ai është Krijuesi i çdo gjëje, prandaj adhurojeni vetëm Atë. Dhe Ai është Kujdestari i çdo gjëje.”²
Të nderuar muslimanë!
Reflektimi i Islamit në jetën shoqërore është vahdeh. Vahdeh do të thotë unitet, bashkim dhe vëllazëri. Edhe pse gjuhët dhe vendet e tyre mund të jenë të ndryshme, besimtarët – Zoti i të cilëve është një, Pejgamberi i tyre është një, Libri i tyre është një dhe kibla e tyre është një – mbeten të bashkuar në çdo rrethanë dhe nuk lejojnë që padrejtësia dhe shtypësit të mbizotërojnë.
Ata i shohin dallimet si pasuri dhe i shndërrojnë ato në mjet bashkimi, jo ndarje dhe përçarje. Në këtë çështje, fjala e Zotit tonë është e qartë: “O pejgamberë! Kjo fe e juaja është një dhe Unë jam Zoti juaj, prandaj më adhuroni vetëm Mua.”³
Të nderuar besimtarë!
Sot, ajo që do ta shpëtojë njerëzimin nga krizat në të cilat ka rënë janë mesazhet udhëzuese të Islamit. Ajo që do ta kthejë botën tonë – e cila rrezikon të shndërrohet në shkatërrim – përsëri në një vend paqeje janë parimet jetëdhënëse të Kuranit Famëlartë. Dhe ajo që do t’i ngrohë zemrat dhe do t’i bashkojë njerëzit është karakteri i lartë i të Dërguarit të Allahut (s.a.v.s.).
Të nderuar muslimanë!
Zoti i Islamit është Allahu i Madhëruar. Ai është Ai që e ka shpallur dhe Ai që do ta ruajë deri në Ditën e Kijametit.⁴ Libri i kësaj feje është Kurani Famëlartë. Pejgamberi i saj është Muhamedi Mustafa (s.a.v.s.), i cili e ka jetuar Islamin në mënyrën më shembullore.
Prandaj, asnjë individ apo grup nuk mund të pretendojë monopol mbi Islamin. Nën pretekstin e mbrojtjes së teuhidit – që është tipari më themelor i Islamit – askush nuk ka të drejtë të përhapë përçarje dhe prishje, apo të dëmtojë unitetin e umetit dhe paqen e shoqërisë.
Nuk duhet harruar kurrë se Islami është fe e lartë, e cila nuk kufizohet në kufij të ngushtë dhe nuk mund të mbyllet brenda një gjeografie të vetme.
Allahu i Madhëruar mos na ndajë kurrë nga vahdeh, nga uniteti, bashkimi dhe vëllazëria. E përfundojmë këtë hutbe me këtë lutje të Pejgamberit Muhamed (s.a.v.s.): “O Allah! Kërkoj mbrojtje tek Ti nga përçarja, hipokrizia dhe morali i keq.”⁵
¹ Ali ‘Imran, 3/19.
² En’am, 6/102.
³ Enbija, 21/92.
⁴ Hixhr, 15/9.
⁵ Ebu Davud, Vitr, 32.
Drejtoria e Përgjithshme e Shërbimeve Fetare
Link:
https://dinhizmetleri.diyanet.gov.tr/Documents/Islam.pdf
Lexo edhe: