Dita e xhumasë në Islam është një nga momentet më të rëndësishme javore për besimtarët, ku forcohen uniteti, vëllazëria dhe lidhja me Allahun.
يَا أَيُّهَا الَّبِينَ أمَنُوا إِذَا تُودِىَ لِلصَّلْوةِ مِنْ يَوْمِ الْجُمُمَةِ فَاسْعَوْا إِلَى ذِكْرِ اللهِ وَذَرُوا الْبَيْعَ ذُلِكُمْ خَيْرُ لَكُمْ إِنْ كُنْتُمْ تَعْلَمُونَ
…وَقَالَ رَسُولُ اللهِ صَلَّى الله عَلَيْهِ وَسَلَّمَ: خَيْرُ يَوْمِ طَلَعَتْ عَلَيْهِ الشَّمْسُ يَوْمُ الْجُمُعَةِ
Të nderuar muslimanë!
Sot është e premte… Ashtu siç ka thënë Profeti ynë i dashur (s.a.v.s.): “Dita më e mirë në të cilën ka lindur dielli është e premtja…”¹
Sot është dita e tubimit javor për ne besimtarët. Është një kohë e veçantë në të cilën forcohen uniteti, bashkimi dhe vëllazëria jonë.
Të dashur besimtarë!
Ndër përgjegjësitë më të rëndësishme që duhet të përmbushim ditën e premte është falja e namazit të xhumasë. Allahu i Madhëruar thotë: “O ju që besuat, kur bëhet thirrja për namaz, ditën e xhumasë, ecni shpejt për aty ku përmendet All-llahu (dëgjojeni hutben, falnie namazin), e lini shitblerjen, kjo është më e dobishme për ju nëse jeni që e dini.”²
Kjo thirrje nuk është vetëm për trupat që të mblidhen në një vend; ajo është që shpirtrat të bashkohen dhe zemrat të lidhen në të njëjtën të vërtetë. Kjo thirrje është që, ashtu siç preken supet, të preken edhe zemrat. Ajo u kujton të gjithë besimtarëve—edhe nëse ndryshojnë në gjuhë, ngjyrë, medh’hebe, pozitë apo status—që të mbështesin njëri-tjetrin si tullat e një muri.
Të nderuar besimtarë!
Thirrja për namazin e xhumasë synon t’u mësojë muslimanëve të lënë mënjanë dallimet, të përqafojnë unitetin, të qëndrojnë larg përçarjes dhe të kapen fort pas njëri-tjetrit—me fjalë të tjera, të jenë një umet. Kjo thirrje na drejton tek jeta shembullore e sahabëve fisnikë, të cilët e dëgjonin hutben sikur mbi kokat e tyre të ishte ulur një zog³ dhe do të fluturonte nëse do të lëviznin. Ajo na kujton gjithashtu që t’i përcjellim të vërtetat e Islamit dhe mesazhet plot mëshirë të Profetit Muhamed (s.a.v.s.) në çdo cep të botës.
Të nderuar muslimanë!
Besimtarët që kujdesen për trupin, veshjen dhe aromën e tyre për të dalë para Allahut ditën e premte, duhet të jenë po aq të kujdesshëm edhe në fjalët dhe sjelljet e tyre në jetën shoqërore dhe të mos i kthejnë shpinën njëri-tjetrit. Ata duhet të jenë ilaç për hallet e njëri-tjetrit dhe zgjidhje për vështirësitë e njëri-tjetrit; nuk duhet të bien në polemika të kota dhe as të kufizohen nga mendësi sipërfaqësore. Umeti i Profetit Muhamed (s.a.v.s.), i cili mblidhet në xhami për të falur namazin e xhumasë dhe kthehet nga e njëjta kible, duhet të mbajë radhët e forta edhe jashtë xhamisë dhe të tregojë durim së bashku përballë vështirësive. Ata duhet të jenë një trup i vetëm përballë armiqve dhe të mbrojnë xhamitë, kiblën dhe vendin e tyre.
Të nderuar muslimanë!
Në këto ditë kur zhvillohen luftëra dhe vuajtje, kur njerëzimi ka nevojë për paqe dhe kur shtypësit pengojnë sexhden në Mesxhidul-Aksa, detyra jonë është të mbajmë gjallë ndërgjegjen e së premtes dhe të umetit. Është të bashkojmë mendjet dhe zemrat tona në të njëjtin besim, në të njëjtën ndjenjë dhe në të njëjtin ideal. Është ta bëjmë të premten një mjet për të ripërtërirë besën e vëllazërisë, për të qëndruar së bashku si gjymtyrët e një trupi dhe për të forcuar unitetin dhe solidaritetin tonë. Dhe është të kujtojmë se mëshira qëndron në unitet, ndërsa ndëshkimi në përçarje.
Ju urojmë të gjithëve një xhuma të bekuar dhe e përfundojmë hutben e kësaj jave me këtë hadith të Profetit tonë të dashur (s.a.v.s.): “Kush merr abdes siç duhet, pastaj vjen në namazin e xhumasë dhe e dëgjon me vëmendje hutben, i falen mëkatet ndërmjet asaj të premteje dhe të premtes tjetër…”⁴
¹ Muslim, Xhuma, 18.
² El-Xhuma, 62/9.
³ Ebu Davud, Tibb, 1.
⁴ Muslim, Xhuma, 27.
Drejtoria e Përgjithshme e Shërbimeve Fetare
Link: https://dinhizmetleri.diyanet.gov.tr/Documents/Friday%20and%20the%20Consciousness%20of%20the%20Ummah.pdf
Lexo edhe: